راولپنڈی۔22اکتوبر(اے پی پی)پاک فضائیہ دے سربراہ ائیر چیف مارشل ظہیراحمد بابر سدھو رومانیہ دے سرکاری دورے دے دوران رومانیہ دی فضائیہ دے سربراہ لیفٹیننٹ جنرل لیونارڈ گیبریل بارابوئی نال ملاقات کیتی، ایں دورے اچ ݙو طرفہ دفاعی تعلقات کوں تکڑا بݨاوݨ اتے ݙوہیں فضائی افواج وچال تعاون ودھاوݨ دے موقع ڳولݨ تے توجہ ݙتی ڳئی ۔ آئی ایس پی آر توں جاری بیان موجب رومانیہ دی فضائیہ دے ہیڈ کوارٹر پُڄݨ تے رومانیہ دی فضائیہ دے چاق و چوبند دستے ائیر چیف مارشل ظہیر احمد بابر سدھو کوں گارڈ آف آنر ݙتا۔ بعد اچ ائیر چیف لیفٹیننٹ جنرل لیونارڈ گیبریل بارابوئی نال سانجھی فضائی مشقاں، تبادلہ پروگراماں اتے فضائی اتے زمینی عملے دی تربیت سودھے آپریشنل تعاون کوں اڳوں وَدھاوݨ تے تفصیلی ڳالھ کیتی۔ انہاں علاقائی سلامتی دی صورتحال تے وی ڳالھ کیتی تے عالمی تے علاقائی استحکام کوں برقرار رکھݨ اچ ݙو طرفہ تعاون دی اہمیت دا اعادہ کیتا۔لیفٹیننٹ جنرل لیونارڈ گیبریل بارابوئی بھارتی جارحیت دے خلاف اڄوکی کامیابیاں اچ پاک فضائیہ دی پیشہ وارانہ مہارت دی تعریف کیتی۔ انہاں ائیر چیف دی بصیرت انگیز قیادت اچ خود انحصاری اقدامات دے ذریعے حاصل کیتی ڳئی پاک فضائیہ دی کامیابیاں دا وی اعتراف کیتا۔ انہاں سانجھے فضائی دفاعی چیلنجز نال نبݨݨ کیتے پائیدار تعاون کیتے مضبوط ادارہ جاتی میکانزم بݨاوݨ تے وی اتفاق کیتا۔ ملاقات دے دوران فریقین ݙوہیں ملکاں دی فضائیہ وچال تعاون کوں وسعت ݙیوݨ تے وی ڳالھ مہاڑ کیتی اتے جدید ایرو سپیس ٹیکنالوجیز اچ دفاعی صنعتی شراکت داری قائم کرݨ دے امکانات دا جائزہ ڳھدا۔ چیف آف دی ائیر سٹاف دا رومانیہ دا اے دورہ پاکستان اتے رومانیہ دے فوجی تعلقات اچ ہک اہم سنگ میل دی نشاندہی کریندے جیڑھا تکھے اُبھرݨ آلے سکیورٹی ماحول ا?? امن، ترقی اتے فوجی تعاون کیتے ݙوہیں ملکاں دے پائیدار عزم کوں اُجاگر کریندے۔
