اسلام آباد۔16ستمبر (اے پی پی) وفاقی وزیر اطلاعات تے نشریات عطاء اللہ تارڑ آکھیا جو عسکری میدان اچ شکست دے بعد بھارت ہن کھیڈ دے میدان اچ اوچھے ہتھکنڈے استعمال کریندا پئے، اے بھارت دی سبکی توں بچݨ دی ناکام کوشش اے، اساں آپݨی عسکری برتری ثابت کیتی اے اتے بھارت دے چھی طیارے مار ݙتے، اساں بھارتی جارحیت دا بھرپور جواب ݙتا جینددے بعد بھارت کوں جنگ بندی دی درخواست کرݨا پئی اتے ہن اوہ کھیڈ دے میدان اچ سیاست کریندا پئے، ہک ایجھی قوم جہڑی اخلاقی طور تے دیوالیہ ہووے اتے جیندے کول کوئی قدریں نہ ہوون او ہمیشہ ایجھے تماشیاں دا سہارا ݙیندی اے، پاکستان پرامن بقائے باہمی تے یقین رکھیندے، پاکستان خطے اچ پائیدار امن کیتے ہمیشہ مؤثر کردار ادا کیتے، پاکستان مسئلہ کشمیر دا اقوام متحدہ دی قرارداداں دے مطابق حل چاہندے۔ اے ڳالھیں انہاں منگل کوں اتھاں انسٹی ٹیوٹ آف ریجنل سٹڈیز اچ ڈاکٹر رابعہ اختر دی کتاب دی تقریب رونمائی توں خطاب کریندیں ہوئیں کیتا۔ وفاقی وزیر اطلاعات آکھیا جو بدقسمتی نال اساݙا ہک حریف ملک ے جیندی پالیسیاں فریب اتے دغا بازی تے مشتمل ہن۔ “اُبھردا ہویا بھارت” دا کوڑا تصور اتے جنوبی ایشیاء اچ دبنگ بݨݨ دا کردار پاکستان چار ݙینھ دی جنگ اچ بہوں مؤثر انداز اچ ناکام ٻݨا ݙتا۔ انہاں آکھیا جو ساری دنیا ݙٹھا جو جݙاں ہک جارح بلا اشتعال اتے بلا جواز جارحیت کیتی تاں ساری پاکستانی قوم ہک تھی ڳئی اتے اساݙے جواب دشمن کوں نہ صرف پچھو ہٹݨ تے مجبور کیتا بلکہ اوں جنگ بندی دی درخواست وی کرݨی پئی۔ انہاں آکھیا جو جݙاں وی تاریخ لکھی ویسی اے چار ݙینھ دی جنگ ہمیشہ پاکستان دی ہک ٻاسہ فتح دے طور تے یاد رکھیی ویسی جئیں اچ پاکستان ہک استحکام ݙیوݨ آلا کردار ادا کیتا اتے ہک ایجھی قوم دے طور تے سامھے آئی جہڑی جنوبی ایشیاء اچ اصل استحکام اتے توازن قائم کیتا۔ انہاں آکھیا جو بھارت خطے اچ آپݨی بالادستی دے عزائم پورے کرݨ کیتے ہندوتوا نظریے کوں ٻیا ودھاوݨ دی کوشش کیتی جڈانجو اے خواب اوں ویلھے چکنا چور تھی ڳیا جݙاں ساری پاکستانی قوم متحد تھی ڳئی اتے خطے اچ ہک نویں ڈیٹرنس قائم تھئی۔ انہاں کتاب دی لکھاری اتے انسٹی ٹیوٹ آف ریجنل سٹڈیز ولوں ایں موضوع کوں ویلھے سر اجاگر کرݨ تے تعریف کیتی۔ انہاں آکھیا جو پاکستان دہشت گردی دے خلاف جنگ اچ 90 ہزار جاناں دی قربانی ݙتی، ارباں ڈالر دے معاشی نقصانات برداشت کیتے، کوئی ٻیا ملک اے دعویٰ نی کر سڳدا۔ انہاں آکھیا جو پاکستان پہلگام واقعہ دی غیر جانبدارانہ اتے منصفانہ تحقیقات دی پیشکش کیتی جیندے نال اے ثابت تھیا جو اساݙے ہتھ صاف ہن۔ انہاں آکھیا جو پاکستان دہشت گردی اتے باقی دنیا دے درمیان ہک ݙھال دا کردار ادا کریندے۔ انہاں آکھیا جو جݙاہں ہک پاکستانی سپاہی، آفیسر یا شہری آپݨی جان مادر وطن تے قربان کریندے تاں او صرف پاکستان بلکہ پوری دنیا کوں محفوظ بݨاوݨ دا سبب بݨدے۔ انہاں آکھیا جو پاکستان خود دہشت گردی دا شکار ملک اے، پہلگام واقعہ تے پاکستان تشویش ظاہر کیتی لیکن جعفر ایکسپریس تے حملہ تاریخ دی بدترین ہائی جیکنگ اچوں ہک ہئی، بھارت اے واقعے دی مذمت یا کم از کم تشویش ظاہر کرݨ توں کیوں ہچکچایا؟ انہاں آکھیا جو کوئی وی جارح یا بالادستی دے عزائم رکھݨ آلا ملک کݙاہیں وی مظلوم نی تھی سڳدا کیوں جو حقائق اوہدے خلاف ہن۔ انہاں آکھیا جو پاکستان ہمیشہ امن دی خواہش کیتی جݙاں وی پاکستان کوں آزمایا ڳیا تاں اساں آپݨی بہادر مسلح افواج دی بدولت ہر وار سرخرو تھئے۔ انہاں آکھیا جو ہن بھارت کرکٹ دے کھیڈ کوں سیاست دی نظر کراوݨ دی کوشش کریندا پئے، اے اصل اچ آپݨی سبکی توں بچݨ دی ہک ناکام کوشش اے۔ اساں آپݨی عسکری برتری ثابت کیتی اتے بھارت دے چھی طیارے مار ݙتے۔ اساڈے بھرپور جواب دے بعد بھارت کوں جنگ بندی دی درخواست ݙیوݨا پئی، ہݨ اوہ کھیڈ دے میدان اچ سیاست کریندا پئے، وفاقی وزیر آکھیا جو مسئلہ کشمیر حکومت دی پہلی ترجیحاں اچ شامل اے، معصوم کشمیری لوکاں دی حمایت، سیاسی سفارتی اتے اخلاقی سطح تے جاری رکھیسوں جڈانجو اقوام متحدہ دی قرارداداں دے مطابق کشمیری لوکاں کوں انہاں دا حق خود ارادیت ݙیوݨ کیتے پرعزم ہیسے. وفاقی وزیر آکھیا جو پاکستان انہاں آکھیا جو پاکستان کول دنیا کوں سنواوݨ کیتے ہک مثبت اتے حوصلہ افزا کہانی موجود اے۔ انہاں آکھیا جو اقوام عالم اچ پاکستان سربلند تھی تے ٹردا پئے اتے دعا اے جو پاکستان ہمیشہ ترقی کرے اتے خوشحال رہوے۔ وفاقی وزیر اطلاعات ڈاکٹر رابعہ اختر کوں کتاب دی اشاعت تے مبارکباد ݙیندیں ہوئیں آکھیا جو اے کتاب اساݙیاں حکمت عملیاں کوں بݨاوݨ اچ دور رس اثرات ݙیسو. ٻہوں سارے پالیسی ساز ایں شاہکار توں مستفید تھیسن. انہاں انسٹی ٹیوٹ آف ریجنل سٹڈیز اتے سینٹر فار سیکورٹی سٹریٹجی اینڈ پالیسی کوں وی ایں اہم اقدام تے مبارکباد ݙتی.
