اسلام آباد۔ 29 ستمبر(اے پی پی)وزیراعظم محمد شہباز شریف آکھیے جو اقوام متحدہ اچ پاکستان دے 24 کروڑ عوام دی ترجمانی اتے غزہ اتے کشمیر دے مظلوم عوام دی آواز بݨݨ دا موقع ملیا، اقوام متحدہ اچ غزہ دی صورتحال تے تھیوݨ آلے اجلاس دا مثبت نتیجہ تیکھے سامݨے آسی، صدر ڈونلڈ ٹرمپ یقین ݙیوائے جو پاکستان نال اقتصادی تعاون ودھایا ویسی، پاکستان اتے سعودی عرب وچال دفاعی معاہدہ کہیں دے خلاف نئیں، حرمین شریفین دی حفاظت کیتے کہیں قربانی توں پچھو تے نا ہٹسوں، پاکستان دی سیاسی و عسکری قیادت خارجہ پالیسی سودھا سارے معاملیاں اچ ہکے صفحے تے اے، معیشت بنیادی استحکام آن چکی اے، ہݨ ترقی اتے پائیدار استحکام کیتے ݙینھ رات کم تھیندا پئے، دوست ملک ساݙے نال ہتھ ونݙاوݨ کیتے تیار ہن، موسمیاتی تبدیلی پاروں اڄوکے سیلاب ٻہوں تباہی مچائی اے?? ساݙا حوصلہ اتے عزم اُچا اے ایں چیلنج توں نکل تے اڳو تے ودھسوں، پچھلی حکومت دہشت گرداں کوں رہا کر تے ڈو واری وسا ݙتا، ملک توں دہشت گردی مکا تے رہسوں، افواج پاکستان بھارت کوں جیڑھا سبق سکھائے او ایکوں ہمیشہ یاد راہسی۔ اے ڳالھیں انہاں سنوار کوں اتھاں برطانیہ اچ رہݨ آلے پاکستانی صحافیاں نال الیندے آکھین۔ وزیراعظم آکھیا جو ساریاں کوں مبارک ہووے، نیویارک اتے واشنگٹن دا اساݙا دورہ ٻہوں کامیاب اتے مفید رہے۔ اقوام متحدہ اچ صدر ٹرمپ اتے ترکیہ دے صدر رجب طیب اردوان دی صدارت ہیٹھ غزہ دی صورتحال بارے اجلاس تھئے۔ ایں اجلاس اچ پاکستان کوں خصوصی طور تے سَݙیا ڳیا ہا۔ قطر، یو اے ای، سعودی عرب، انڈونیشیا، اردن اتے مصر وی اجلاس اچ شریک تھئے۔ اقوام متحدہ دی عمارت اچ غزہ دی صورتحال تے اجلاس ہک چنڳی اڳونہی اے۔ غزہ بارے اجلاس اچ حوصلہ افزا ڳالھ مہاڑ تھئی، پورا یقین اے جو غزہ تے حالیہ اجلاس دا مثبت نتیجہ ٻہوں تیکھے سامݨے آسی، اساں چاہندے ہیں جو غزہ اچ فوری جنگ بندی ہووے، غزہ اچ 2023ء توں ظلم و ستم دا بازار گرم اے، بے گناہ مسلماناں کوں شہید کیتا ویندا پئے جیندے اچ ٻال اتے تریمتیں وی شامل ہن۔ وزیراعظم آکھیا جو غزہ اچ مسلماناں دے خلاف بربریت دی مثال تاریخ اچ نئیں ملدی۔ میں الحمدللہ غزہ دی صورتحال تے جنرل اسمبلی اچ ودھ آواز چاتی، فلسطینی بھراواں اتے ٻھیݨیں نال یکجہتی کیتی اے اتے مسئلہ کشمیر اتے کشمیر دی آزادی کیتے وی جنرل اسمبلی دے فورم تے تکڑی اآواز چاتی اے۔ وزیراعظم آکھیا جو معرکہ حق اچ اساں بھارت کوں شکست فاش ݙتی، اللہ تعالیٰ دے فضل و کرم نال بھارت کوں اینڄھا سبق سکھائے جیڑھا ساری زندگی ایکوں یاد راہسی، ایں حوالے نال وی میں ڳالھ کیتی۔ وزیراعظم آکھیا جو پاݨی تے ساݙے حق تے وی آزاز چاتی اے، اساں جنگ جِت ڳھدی اے، اساݙی بہادر مسلح افواج انتہائی پیشہ ورانہ صلاحیت اتے مہارت ݙکھائی، انہاں دا عزم انتہائی مضبوط اتے پکا ہا، فیلڈ مارشل سید عاصم منیر دی قیادت اچ معرکہ حق اچ پاکستان تاریخی فتح حاصل کیتی۔ جنگ اچ پوری قوم آپݨی مسلح افواج دے پِچھو کھڑی ہئی۔ پاک فضائیہ ایئر چیف مارشل ظہیر احمد بابر سدھو دی قیادت اچ اساݙے بہادر شاہیناں آپݨی جرات اتے بہادری ݙکھائی اتے پیشہ ورانہ صلاحیتاں ݙکھائن، ڄڳ کوں یقین تھیا جو پاکستان دی ایٹمی صلاحیت صرف دفاعی مقاصد کیتے اے، 24 کروڑ عوام دیاں دعائیں آپݨی بہادر مسلح افواج دے نال ہن۔ وزیراعظم آکھیا جو اللہ تعالیٰ دے فضل و کرم اتے 24 کروڑ عوام دیاں دعائیں نال معیشت بنیادی استحکام حاصل کر چُکی، ہݨ ترقی اتے پائیدار استحکام کیتے ݙینھ رات کم تھیندا پئے، بدقسمتی نال موسمیاتی تبدیلی پاروں حالیہ سیلاب ٻہوں وݙی تباہی مچائی اے، 2022ء دے سیلاب نال سن??ھ جݙاں جو حالیہ سیلاب نال پنجاب اچ ودھ نقصانات تھئن۔ ہک ہزار توں ودھ لوک موئن، ہزاراں دیہات پاݨی نال ٻݙݨ، فصلاں تباہ تھئین اتے جائیداد کوں وی نقصان پڄیے، سیلاب توں تھیوݨ آلے نقصانات دا اندازہ لایا ویندا پئے، اساݙا حوصلہ اتے عزم اُچے ہن اتے انشاءاللہ ایں صورتحال نال نٻݨسوں اتے ایں چیلنج توں نکل تے اڳوں ودھسوں۔ ہک سوال دے ولدے اچ وزیراعظم آکھیا جو واشنگٹن اچ صدر ڈونلڈ ٹرمپ نال انتہائی مفید، تعمیری اتے خوشگوار ماحول اچ ملاقات تھئی، آپسی تعلقات ٻئے بہتر بݨاوݨ اچ اے ملاقات اہم رہی، ملاقات اچ تجارت، سرمایہ کاری، تیل و گیس دے شعبے اچ سرمایہ کاری تے ڳالھ تھئی، آئی ٹی، زراعت اتے ٻئے شعبیاں اچ تعاون تے وی ڳالھ تھئی۔ صدر ڈونلڈ ٹرمپ یقین ݙیوائے جو پاکستان نال اقتصادی تعاون اچ مزید وسعت گھن آئی ویسی۔ ہک سوال دے جواب اچ وزیراعظم آکھیا جو دوست اتے برادر ملک سعودی عرب نال دفاعی معاہدہ کیتا ڳئے، سعودی عرب دے دورے اچ پاکستان کوں ودھ عزت ݙتی ڳئی، سعودی قیادت شاندار انداز اچ استقبال کیتا جو 24 کروڑ پاکستانیاں کیتے ماݨ دی ڳالھ اے۔ وزیراعظم آکھیا جو دہشت گردی بدقسمتی نال ݙو واری سر چاتے، کڄھ سال پہلے دہشت گرد رہا کیتے ڳئے، انہاں کوں ول آوݨ ݙتا ڳیا، اے بالکل نئیں ہووݨا چاہیدا، پچھلی حکومت دہشت گرداں کوں رہا کر کے ݙو واری وسا ݙتا، دہشت گردی دی وݙی وجہ دہشت گرداں کوں ولا وساوݨ اے، فتنہ الخوارج، کالعدم ٹی ٹی پی، بی ایل اے اتے مجید بریگیڈ فتنہ ہندوستان دے آلہ کار ہن۔ افواج پاکستان، قانون نافذ کرݨ آلے ادارے اتے پولیس سارے رَل تے ݙینھ رات انسداد دہشت گردی کیتے کم کریندے پئن، دہشت گرداں دا صفایا کیتا ویندا پئے?? ساݙے جوان اتے افسران وطن دی حفاظت کیتے ݙینھ رات قربانیاں ݙیندے پئن۔ جیڑھے ٻاہرلے ہتھ دہشت گردی دے پِچھآ ہن او پاکستان کوں آدہدا نئیں ݙیکھ سڳدے، فتنہ الخوارج دے خلاف سکیورٹی فورسز دیاں قربانیاں ہمیشہ یاد رکھیاں ویسن، دہشت گرداں دا صفایا کر تے رہسوں۔ وزیراعظم آکھیا جو دہشت گردی مکاوݨ کیتے اساݙے جوان اتے افسران آپݨیاں جاناں دا نذرانہ پیش کریندے پئن، ایں توں وݙی ٻئی کیہڑی قربانی تھی سڳدی اے۔ انشاءاللہ اساں دہشت گردی مکاوݨ اچ کامیاب تھیسوں، پاکستان دی ترقی توں خوفزدہ دہشت گرد تنظیماں دا صفایا کریسوں، ملک توں دہشت گردی دیاں پاڑاں پٹ کے ہ?? ساہ ڳھنسوں۔ وزیراعظم آکھیا جو اللہ تعالیٰ دا وݙا فضل اے جئیں ساکوں موقع ݙتا اتے میں نہ صرف اقوام متحدہ اچ پاکستان دے 24 کروڑ عوام دے جذبات دی ترجمانی کیتی، ٻھل غزہ اتے کشمیر اچ جیڑھا ظلم تھیندا پئے اتھو دے مظلوماں دی آواز بݨیاں۔ ہک سوال دے جواب اچ وزیراعظم آکھیا جو صدر ڈونلڈ ٹرمپ نال ملاقات اچ فیلڈ مارشل سید عاصم منیر، امریکا دے نائب صدر جے ڈی وینس اتے وزیر خارجہ مارکو روبیو وی موجود ہن، اساݙی انتہائی تعمیری ڳالھ مہاڑ تھئی۔ پاک بھارت جنگ بندی اچ اہم کردار ادا کرݨ تے صدر ڈونلڈ ٹرمپ دا شکریہ ادا کیتا۔ جنگ لمبی ویندی تاں ایںدے وݙے نقصان تھی سڳدے ہن۔ میں انہاں کوں ݙسیا جو ݙوہائیں ملک ایٹمی طاقتاں ہین، ڄیکر صدر ڈونلڈ ٹرمپ ویلھے سر اتے فیصلہ کن کردار ادا نہ کریندے تاں نہ صرف خطے ٻھل ڄڳ تے ایں جنگ دے اثرات پوندے، ایہا وجہ اے جو پاکستانی قوم امن کوششاں تے نوبل انعام کیتے صدر ڈونلڈ ٹرمپ دا ناں ݙتے، صدر ڈونلڈ ٹرمپ ایںدے علاوہ وی دنیا اچ کشیدگی مکاݨ کیتے کردار ادا کیتے۔ ہک ٻئے سوال دے جواب اچ وزیراعظم آکھیا جو او اتے فیلڈ مارشل سید عاصم منیر خارجہ پالیسی اتے معیشت سودھا ہر معاملے تے مشورہ کریندن اتے اساں ہک پیج تے ہیں، اخلاص نال ݙینھ رات محنت کریندے پئے ہیں، دعا اے جو اے ہم آہنگی جاری راہوے تاں جو ماضی دے نقصانات دا ازالہ تھی سڳے، ݙینھ رات محنت نال پاکستان اوج ثریا دی منزل حاصل کریسی۔ ہک ٻئے سوال دے جواب اچ وزیراعظم آکھیا جو پاکستان اتے سعودی عرب وچال دفاعی معاہدہ کہیں دے خلاف نئیں، سعودی عرب پاکستان دا دوست اتے برادر ملک اے صدیاں اتے ݙہاکیاں توں پاکستان اتے سعودی عرب وچال اعتماد دا وݙا تکڑا رشتہ اے، ایکوں اساں باضابطہ بݨائے اتے ایں معاہدے اچ اے شئے شامل اے جو ہک ملک تے ڄیکر حملہ ہوسی تاں ݙوڄھے ملک تے وی حملہ سمجھیا ویسی اتے رَل تے ا??ںد?? مقابلہ کریسوں، دفاعی معاہدہ پاکستان اتے سعودی عوام دی پراݨی سک ہئی ڄیڑھی پوری کیتی ڳئی اے۔ ہر مسلمان روضہ رسول صلی اللہ علیہ وسلم اتے خانہ کعبہ دی حفاظت کیتے کَٹ مرݨ کیتے تیار اے، اے معاہدہ کر کے اساں دین اتے دنیا ݙوہائیں کمائن، حرمین شریفین دی حفاظت کیتے کہیں قربانی توں پچھو نا ہٹسوں۔ وزیراعظم آکھیا جو اساں طاقت دی دروک اچ شامل کائنی، اساں پاکستان دی ترقی اتے خوشحالی چاہندے ہیں اتے ملک دی اقتصادی منزل کیتے ردھے ہوئے ہیں، غربت و بے روزگاری مکاوݨ اتے سرمایہ کاری ودھاوݨ کیتے اقدامات تھیندے پئن۔ زراعت، آئی ٹی، مصنوعی ذہانت، کان کنی و معدنیات اتے نینگراں تے خصوصی توجہ ݙتی ویندی پئی اے کیونجو نینگراں دی وݙی آبادی ہک چیلنج دے نال نال اساݙے کولو ہک موقع وی اے ڄیکر اساں نینگراں کوں تعلیم دے زیور نال آراستہ کروں، انہاں کوں فنی تربیت، آئی ٹی، زراعت، مصنوعی ذہانت اچ موقع ݙیووں تاں ملک ودھ تیزی نال ترقی کریسی۔ وزیراعظم آکھیا جو ہک ہزار طالب علماں کوں چین اچ تربیت ݙتی ویندی پئی اے او ول آ تے ملک دے زرعی شعبے اچ انقلاب ڳھن آسن، اساں پاکستان دی مضبوط اقتصادیات کیتے جدوجہد کریندے پئے ہیں ایںدے تے پوری اساݙی توجہ اے، ایںدے نال نال دنیا اچ تھیوݨ آلی تبدیلیاں تے وی اساݙی اکھ اے۔ ہک ٻئے سوال دے جواب اچ وزیراعظم آکھیا جو میں سودھا پوری قوم چاہندی اے جو پاکستان معاشی طور تے ہک خوشحال ملک بݨ ونڄے، آپݨے پیراں تے کھڑا تھیوے، قرضیاں توں نجات حاصل کرے، آپݨی دولت خود پیدا کرے۔ ایں حوالے نال پاکستانی قوم اچ صلاحیت موجود اے اتے اللہ تعالیٰ ساکوں قدرتی وسائل نال مالا مال کیتا ہوئے، ویلھا آڳئے جو ایں توں پورے طور تے فائدہ چاتا ونڄے، دوست ملک اساݙے نال ہتھ ونݙاوݨ کیتے مکمل طور تے تیار ہین، خلیجی ملک، سعودی عرب اتے امریکا تعاون کرݨ چاہندن چین دے نال اساݙے سٹریٹجک تعلقات ہن ایں توں بہتر حالات تھی نی سڳدے۔ اساں بھرپور عزم دے نال کم کروں تاں ول کوئی شئے اساݙے رستے اچ رکاوٹ نی بݨ سڳدی۔ ہک ٻئے سوال دے جواب اچ وزیراعظم آکھیا جو اقوام متحدہ اچ صدر ڈونلڈ ٹرمپ دی صدارت اچ جیڑھا اجلاس تھیا او غزہ دی صورتحال تے ہی تھیا ہا جو کیویں غزہ اچ تیکھت جنگ بندی تھیوے اتے اُتھاں امن قائم تھیوے۔ ایں اجلاس دے بعد میݙیاں توقعات ودھین اتے واشنگٹن اچ وی صدر ڈونلڈ ٹرمپ نال ملاقات اچ ایں معاملے تے ڳالھ تھئی تاں ایںدے نال میݙا حوصلہ ٻیا ودھیے، امید اے جو ٻہوں تیکھے ایں حوالے نال چنڳیاں خبراں ملسن
.jpg)
