اسلام آباد۔2اکتوبر (اے پی پی) نگراں وفاقی وزیر برائے داخلہ سرفراز احمد بگٹی آکھیا جو سمگلنگ اتے ذخیرہ ا ندوزی دے خلاف مربوط اتے ٹیکنالوجی نال کاروائی کرݨ دے شاندار نتیجے نکلین۔ سمگلنگ اتے ذخیرہ اندوزی اچ ملوث بندہ چاہے جتنا وی اثر آلا کیوں نہ ہووے اونکوں قانون دے کٹہرے اچ آن تے کیفر کردار تئیں پڄایا ویسی۔ الیکشن کمیشن آف پاکستان کوں انتخابات اچ سکیورٹی سودھے ہر تعاون کریسوں۔ اے ڳالھیں انہاں سنوار کوں نگراں وفاقی وزیر اطلاعات تے نشریات مرتضیٰ سولنگی دے رلے پریس کانفرنس توں خطاب کریندیں ہوئیں آکھی۔ انہاں آکھیا جو غیر قانونی کماں سمگلنگ ، ذخیرہ اندوزی اتے حوالہ ہنڈی دے خلاف وزیراعظم دی خصوصی ہدایات تے سخت اقدامات کیتے ویندے پئن۔ ایں بارے صوبہ بلوچستان اچ 10 سانجھی چیک پوسٹاں ٻݨائی ڳئن جیڑھی کسٹم حکام، فرنٹیئر کور اتے پولیس حکام دی ہن جنہاں کوں خصوصی طور کسٹم اختیارات ݙتے ڳئن۔ ہݨ انہاں چیک پوسٹاں دی تعداد ݙاہ توں 14 کیتی ویندی پئی اے۔ اینجھی 14 سانجھی چیک پوسٹاں صوبہ پنجاب ، 10 سندھ اتے 7 خیبر پختو نخوا اچ ٻݨائی ویندی پئن۔
