برسلز۔22مارچ(اے پی پی) وزیر خارجہ محمد اسحاق ڈار جوہری توانائی دے پہلے سربراہ اجلاس دے موقع تے برسلز اچ چین دے نائب وزیراعظم ژانگ گوچنگ نال ملاقات کیتی ۔ دفتر خارجہ دی طرفوں جاری بیان موجب ملاقات اچ وزیر خارجہ محمد اسحاق ڈار اتے چین دے نائب وزیراعظم ژانگ گوچنگ پاکستان۔چین آل ویدر سٹریٹجک کوآپریٹو پارٹنرشپ تے مضبوط دوستی کوں مثالی تے منفرد تعلقات دے طور تے تعریف کیتی ۔ انھاں سول نیوکلیئر ٹیکنالوجی اچ پاکستان تے چین وچال پراݨے تعاون دی اہمیت تے اتفاق کیتا۔ ملاقات اچ وزیر خارجہ محمد اسحاق ڈار ون چائنا پالیسی سانڳے پاکستان دی پراݨی حمایت دا اعادہ کیتے۔ انہاں اے ڳالھ زور ݙے تے آکھی اے جو چین نال تعلقات تے پاکستان اچ مکمل اتفاق رائے اے اتے سی پیک دے فیز 2 سانڳے پاکستان مضبوط عزم رکھیندے۔ ایں موقع تے چینی نائب وزیراعظم ایں ڳالھ دا اعادہ کیتے جو چین پاکستان دی مالی صورتحال کوں مستحکم کرݨ اچ مدد کریسی ۔ انہاں چین پاکستان اقتصادی راہداری دے منصوبہ (سی پیک) کوں اپ گریڈ کرݨ ،صنعت، کان کنی اتے انفارمیشن ٹیکنالوجی سودھے مختلف شعبیں اچ تعاون کوں مزید تکڑا کرݨ سانڳے چینی آمادگی دا اظہار کیتے۔
