واشنگٹن۔26ستمبر(اے پی پی)وفاقی وزیر خزانہ و محصولات محمد اورنگزیب بین الاقوامی مالیاتی فنڈ (آئی ایم ایف) ولوں پاکستان کیتے نویں پروگرام دی منظوری اچ ہتھ ونݙاوݨ تے امریکہ اتے چین دا شکریہ ادا کیتے۔ اے ڳالھ وزیر خزانہ سینیٹر محمد اورنگزیب واشنگٹن اچ امریکی نشریاتی ادارے کوں انٹرویو اچ آکھی۔ انہاں آکھیا جو اساں چاہندوں کہ آئی ایم ایف دا اے چھیکڑی پروگرام ہووے ٻھل ایں سانڳے ملکی معیشت اچ بنیادی اصلاحات، برآمدی معیشت دے ودھارے سانڳے معاشی ڈھانچے اچ تبدیلیاں ضروری ہین۔ حکومت کولو ایں ویلھے معاشی اصلاحات کیتے بغیر کوئی راہ کائنی، ایندے کیتے ٹیکس نیٹ توں ٻاھرو موجود شعبیاں کوں دائرہ کار اچ ڳھن آوݨا ہوسی، تنخواہ دار اتے مینوفیکچرنگ طبقے تے ڄیڑھا وادھو ٻھار سٹیا ڳئے اوکوں ڳھٹایا ویسی، ریٹیلرز، ہول سیلرز، زراعت اتے پراپرٹی دے شعبیاں کوں ٹیکس نیٹ اچ ڳھن آوݨا ہوسی، حکومت ہݨ نان فائلر اصطلاح مکیندی پئی اے، ٹیکس نا ݙیوم آلیاں تے اینڄھیاں پابندیاں لڳ ویسن جو او ٻہوں سارے کم نا کر سڳسن، حکومت کولو مکمل ڈیٹا موجود اے جو کیندی کتنی جائیداد اتے مال و دولت اے، خرچے تے اخراجات کیا ہین، ایں سانڳے فیڈرل بورڈ آف ریونیو (ایف بی آر) ٹیکس ادا نہ کرݨ آلیاں کوں گرفتار کیتے بغیر انہاں کوں ٹیکس نیٹ اچ رلیسی۔ انہاں آکھیا جو پاکستان اچ 9 کھرب ڈالر دی غیر دستاویزی معیشت اے ڄیکوں دستاویزی شکل ݙے تے ملکی معیشت کوں ڈبل ڈیجٹ کیتا ونڄ سڳدے۔
