باکو۔12نومبر (اے پی پی):وزیراعظم محمد شہباز شریف آکھیا جو انسانیت دی بقا گلیشئرز دے تحفظ نال مشروط اے،گلیشیئرز دے پگھلائو روکݨ کیتے سنجیدہ اتے موثر اقدامات دی لوڑھ اے۔گلیشیئرز دے ٻئے پگھلائو کوں روکݨ کیتے کوششاں اتے علاقائی تعاون دی اہمیت اے، پائیدار بنیاداں تے گلیشئرز دے تحفظ کوں یقینی ٻݨاوݨ کیتے ڈیٹا شیئرنگ اتے معیاری مانیٹرنگ کیتے ملکاں دی استعداد کوں مستحکم ٻݨاوݨا پوسی۔ پاکستان ایں بارے عالمی برادری نال رَل تے کم کرݨ کیتے تیار اے۔ منگل کوں تاجکستان دی میزبانی اچ گلیشیئرز دے تحفظ بارے اقدامات کیتے اعلیٰ سطح دی تقریب توں خطاب کریندیں ہوئیں وزیراعظم شہباز شریف آکھیا جو تاجکستان دے صدر ولوں ایں بارے اہم اجلاس دا خیر مقدم کریندوں جئیں اچ شریک وفود دنیا خصوصی طور ایں خطے اچ تیزی نال پگھلدے گلیشئرز کوں روکݨ کیتے آپݨا حصہ پیندے پئن۔ وزیراعظم آکھیا جو گلیشیئرز دے تحفظ دے عالمی سال دے موقع تے سنیھا ݙیوݨ چاہنداں جو گلیشئرز دی منتقلی دی بجائے ایندے پگھلاؤ کوں ڳھٹ کرݨ، وائٹل ایکو سسٹم دے تحفظ اتے مسئلیاں کیتے پائیدار آبی وسائل کوں محفوظ ٻݨاوݨ اے۔ وزیراعظم آکھیا جو پاکستان وݙے پیمانے تے گلیشئرز دا گھر اے۔ انہاں نقصان کوں روکݨ کیتے اساں کیتے ضروری اے۔ انہاں گلیشئرز نال دنیا کوں ستر فیصد تازہ پاݨٰی ملدے۔ پاکستان اچ ست ہزار توں ودھ گلیشیئرز موجود ہن جئیں نال دریائے سندھ دا 60 توں 80 فیصد پاݨی دستیاب ہوندے اتے پاکستان دی زراعت دا نوے فیصد پاݨی اتھوں ملدے اتے 20 کروڑ عوام دی خدمت کریندا پئے۔ 1960ء دے مقابلہ اچ گلیشیئرز اچ 23 فیصد ڳھٹکی تھئی اے۔ اے ہک تشویشناک صورتحال اے اتے فوری کاروائی منڳدی اے۔ انہاں آکھیا جو ”گلیشیئر 2025ء اقدام” ایں بحران آلے پاسے عالمی توجہ ݙواوݨ کیتے ہک وکھری کوشش اے۔ وزیراعظم آکھیا جو پاکستان کوں گلیشیئرز مانیٹرنگ پروگرام، ارلی وارننگ سسٹم، پاݨی دے ذخیرہ کرݨ دے متبادل حل سودھے ٻئے اقدامات کیتے امداد ودھاوݨ دی لوڑھ اے۔ وزیراعظم آکھیا جو پاکستان انہاں قدرتی وسائل دے تحفط کیتے عالمی برادری نال رل تے کم کرݨ کیتے تیار اے۔ گلیشیئرز، بنی نوع انسان اتے کرہ ارض دے مستقبل دے تحفظ کیتے سارے ملکاں کوں متحد تھی تے اقدامات کرݨے پوسن۔ (م،ن: ڈ،س،ک)20:54
