اسلام آباد۔25جنوری (اے پی پی):الیکشن کمیشن خیبر پختونخوا اتے پنجاب اچ عام انتخابات دے انعقاد کیتے 14 ارب38 کروڑ روپے دی اضافی ٹیکنیکل ضمنی گرانٹ منگدے ہوئیں اڄوکےمالی سال دے دوران ݙوہیں صوبیں تے قومی اسمبلی دے 93 حلقیں اچ ضمنی انتخاب کیتے 20ارب 54 کروڑروپے توں ودھ دی رقم جاری کرݨ دی استدعا کر ݙتی۔ ٻدھ کوں وفاقی سیکرٹری خزانہ دے ناں لکھیے ڳئے ھک خط اچ سیکرٹری الیکشن کمیشن دی طرفوں آکھیا ڳئے جو الیکشن کمیشن انتخابی قانون 2017 دی شق 219 اتے آئین پاکستان دے تحت عام انتخابات دے انعقاد داپابند اے۔ خیبر پختونخو تے پنجاب دی صوبائی اسمبلیاں تحلیل تھی چکن جݙاں جو قومی اسمبلی دے 93 حلقے خالی ہن جتھاں ضمنی انتخاب کراوݨے ہن ۔ ایں ضمن اچ وزارت خزانہ 14 ارب 38 کروڑ 80 لکھ روپے دی اضافی سپلیمنٹری ٹیکنیکل گرانٹ مہیا کرے جݙاں جو اڄوکے مالی سال دے دوران 20 ارب 54 کروڑ 40 لکھ روپے دااجرا کیتا ونڄے ۔الیکشن کمیشن وزارت خزانہ کوں لکھیے جو 5 ارب روپے پہلے ہی جاری کیتے ڳئن جݙاں جو 20 ارب 54 کروڑ 40 لکھ روپے مزید فوری جاری کیتے ونڄن ۔ عام انتخابات دی کل لاڳت 47 ارب 41 کروڑ 70 لکھ روپے توں ودھ تے 61 ارب 80 کروڑ 50 لکھ روپے تھی ڳئی اے جݙاں جو 14 ارب 38 کروڑ 80 لکھ روپے دی اضافی ضمنی گرانٹ درکار اے تاں جو مختلف مراحل اچ عام انتخابات داانعقاد کرایا ونڄ سڳے۔
