اسلام آباد۔22دسمبر(اے پی پی) بیلا روس دی طرفوں پاکستانی سیلاب زدگان کیتے انسانی ہمدردی دی بنیاد تے بھجوایا ڳیا امدادی سامان اسلام آباد دے بین الاقوامی ہوائی اݙے تے پڄ ڳئے جیں کوں بیلارس دی وزارت ہنگامی حالات بیلارس دے صدرتے حکومت دی ہدایت تے بھجوایا ہئی ۔بیلاروس دی سفارت خانے دی طرفوں جاری بیان موجب کارگو آئی ایل 76 ٹرانسپورٹ طیارے اچ بیلاروس دی وزارت ہنگامی حالات دے نائب وزیر ،اتے بین الاقوامی خدمات دے شعبے دے میجر جنرل ایگور بولوٹوف دی سربراہی اچ ھک وفد دے رلے اسلام آباد انٹرنیشنل ایئرپورٹ پڄے ۔ کارگو دا وزن 27.7 ٹن وزنی اتے مالیت 4 لکھ ڈالر توں ودھ اے ۔ ایندے وچ فریم ٹینٹ، پٹرول پمپنگ پلانٹس، ڈیزل جنریٹر،کمبل، دوائیں تے ٻالاں تے وݙیں کیتے کپڑے،صفائی کیتے کٹس، پاݨی دی کنڈیشننگ اتے جراثیم کشی ،ہینڈ سینیٹائزنگ اتے ایمرجنسی ڈس انفیکشن دیاں دوائیں شامل ہن۔ پاکستان تے جمہوریہ بیلاروس دے درمیان سفارتی تعلقات دا آغاز 3 فروری 1994 کوں تھیا ۔ ݙوہیں ملکاں دے دوستانہ تعلقات ہن جیڑھے جو کثیرالجہتی شراکت داری دی شکل اختیار کرچکن ۔ݙوہیں ملکاں وچال ݙو پاسے تجارت دا حجم گزرییل 15 سال اچ اوسطاً 50 توں 120 ملین ڈالر سالانہ رہیا۔ بیلاروس تے پاکستان عالمی اتے علاقائی ایجنڈے دے اہم مسئلیں نال نبݨݨ کیتے بین الاقوامی میدان اچ ھک ݙوجھے دے نال نیڑے تعاون کریندے پئن ۔
